Մեկնաբանություններ
ՕԵԿ-ը դանդաղ հրածեշտե տալիս իշխանությանը եվ փորձում է ավելի շատ փող աշխատել
Ավետիս ԲԱԲԱՋԱՆՅԱՆ
Մարտի 13-ին տեղի ունեցած ՕԵԿ քաղխորհրդի նիստում, որոշում է ընդունվել հետ կանչել Կապի և տրանսպորտի նախարար Գուրգեն Սարգսյանին և Արտակարգ իրավիճակների նախարար Մհեր Շահգելդյանին: Սարգսյանին փոխարինելու է դեռևս մեկ տարի առաջ Կադաստրի պետական կոմիտեի նախագահի պաշտոնը զբաղեցնող Մանուկ Վարդանյանը,իսկ Շահգելդյանին` փոխոստիկանապետ Արմեն Երիցյանը:
Եթե ՕԵԿ-ը որոշեր հետ կանչել իր երրորդ նախարարին` Գյուղատնտեսության նախարար Գերասիմ Ալավերդյանին, երևի թե ոչ ոք չզարմանար` նկատի ունենալով վարչապետի խիստ նկատողությունը: Բայց ՕԵԿ-ում ավելի ճիշտ
են համարել պահել հենց նկատողություն ստացածին:
Շատերը այս հետկանչը բացատրում են ՕԵԿ նվազող ազդեցությամբ. ասում են, թե ՕԵԿ-ը կորցրել է իր հետաքրքրությունն իշխանության համար և այդ պատճառով նրանից որոշել են հետ վերցնել այդ պաշտոնները: Ճիշտ է, ֆորմալ առումով Մանուկ Վարդանյանին և Արմեն Երիցյանին նախարար առաջադրել է ՕԵԿ-ը, սակայն շատերը զարմանում են, թե ինչու± կուսակցությունը չօգտվեց իր հզոր կադրային բանկից և որոշեց ՕԵԿ փոխնախագահին փոխարինել անկուսակցական մարդկանցով, ովքեր ոչ մի կապ չունեն ՙՕրինաց երկրի՚ հետ: Բայց սա այնքան էլ համոզիչ բացատրություն չէ, թեկուզ հենց այն պատճառով, որ այդ դեպքում առաջինը պետք է փոխարինվեր հենց Գերասիմ Ալավերդյանը:
Այն, որ ՕԵԿ-ը կորցրել է իր հեղինակությունը և ազդեցությունը, գաղտնիք չէ որևէ մեկի համար: Դրա ամենավառ ապացույցը 2009 թ. Երևանի ավագանու ընտրություններն էին: Արդեն պարզ է, որ ոչ մի քաղաքական և նախընտրական տեխնոլոգիա չի կարող 2012 թ. ՕԵԿ-ին օգնել հայտնվել խորհրդարանում և մասնակցել իշխանության ձևավորմանը, ունենալ նախարարներ և այդ ճանապարհով փայ ստանալ իշխանական կերակրատաշտից: Հենց այս տրամաբանության շրջանակներում էլ ՕԵԿ նախագահ Արթուր Բաղդասարյանը որոշել է առավելագույնը օգտվել ներկա հնարավորությունից, որը երբևէ չի կրկնվելու: Այսինքն, Բաղդասարյանը որոշել է նախարար նշանակել այնպիսի մարդկանց, ովքեր իրենց աշխատանքով կապահովեն իր ապահով և երջանիկ ծերությունը:
ՕԵԿ փոխնախագահ Մհեր Շահգելդյանը գրեթե երկու տարի զբաղեցրեց Արտակարգ իրավիճակների նախարարի պաշտոնը: Բայց բոլորին հայտնի է, որ այդ նախարարությունը ղեկավարում էր ոչ թե Մհեր Շահգելդյանը, այլ նրա առաջին տեղակալ,Հայաստանի փրկարար ծառայության ղեկավար գեներալ-լեյտենանտ Էդիկ Բարսեղյանը, ով մինչև նախարարության ստեղծումը և Շահգելդյանի նշանակումը Արտակարգ իրավիճակների վարչության պետն էր:
Պարզ է, որ Շահգելդյանը ոչ մի հնարավորություն չի ունեցել վերահսկելու նախարարության ստվերային ֆինասական հոսքերը, էլ ուր մնաց` թե դրանից բաժին հաներ կուսակցական գանձանակին: Իսկ ու±մ է պետք մի նախարար, որը ոչ մի օգուտ չի տալիս կուսակցությանը և նրա բարձր ղեկավարությանը: Դրա համար Շահգելդյանին պետք էր անպայման փոխարինել: Անկեղծ ասած, իմաստ չուներ նրան ընդհանրապես նշանակել նախարար, սակայն այդ պահին ավելի հարմար թեկնածու թերևս չի գտնվել:
ԱԻՆ-ում, որպես նախարարի տեղակալ, աշխատում են չորս գեներալ. Արթուր Բաղդասարյանը հասկացել է, որ այդտեղ իրեն օգտակար կարող է լինել մի մարդ, ով կարող է ղեկավարել այդ գեներալներին և, այդ իմաստով, բոլորովին էլ պատահական չէ գեներալ Արմեն Երիցյանի ընտրությունը:
Նույն տրամաբանությամբ կարելի է բացատրել նաև վարչական աշխատանքի մեծ փորձ ունեցող Մանուկ Վարդանյանի ընտրությունը: Կապի և տրասպորտի նախարարությունում որոշ փոխնախարարներ ավելի մեծ ազդեցություն ունեին, քան նախարար Գուրգեն Սարգսյանը: Մինչդեռ կարելի է հույս ունենալ, որ Մանուկ Վարդանյանին կհաջողվի ինչ որ կերպ զսպել փոխնախարարների ախորժակը և Արթուր Բաղդասարյանին ապահովել անհրաժեշտ բոլոր միջոցներով` կատարյալ երջանիկ լինելու համար: Ինչ վերաբերվում է Գյուղնախարար Գերասիմ Ալավերդյանին, ապա նա իր պաշտոնավարման շատ կարճ ժամանակահատվածում ցույց տվեց, որ կարող է բավական արդյունավետ նախարար լինել: Նրա շնորհիվ Հայաստանը հակադաբաղային պատվաստանյութերը գնել էր երկու անգամ թանկ: Ճիշտ է, նախարարը դրա համար խիստ նկատողություն ստացավ, սակայն կարևորը` նրանից գոհ է Արթուր Բաղդասարյանը: Հենց այդ պատճառով նա կշարունակի նախարար աշխատել, իսկ Շահգելդյանն ու Սարգսյանը` ոչ:
