Հրապարակումներ
Ում շահերն են սպասարկում «քաղաքի տերերը»
Հայկազ ՍԻՄՈՆՅԱՆ
Նախագահ Սերժ Սարգսյանի աշխատակազմի ղեկավար Կարեն Կարապետյանի աճող ազդեցությունն իշխանական համակարգում հակազդեցության տարբեր ձևեր է ընդունում: Հակազդման այլ լծակներ չգտնելով՝ Կարապետյանի քաղաքական հակառակորդները փորձում են վարկաբեկել նրան, հասարակությանը ներկայացնելով որպես մի մարդու, որը հանուն անձնական շահի պատրաստ է ոչնչացնել Երևանի կանաչ տարածքները, ոտնահարել համաքաղաքացիների հասարակական շահերը:
«Մե՛նք ենք այս քաղաքի տերը» քաղաքացիական նախաձեռնությունը երեկ հանդես է եկել հայտարարությամբ, որով «Տաշիր գրուպ» ընկերության նախագահ Սամվել Կարապետյանին կոչ է անում հանուն երևանցիների վերանայել Մաշտոցի և Գլխավոր պողոտաների այգում ստորգետնյա և վերգետնյա շինարարություն սկսելու մասին որոշումը:
Հայտարարության հեղինակները նշում են, որ այդ շինարարությունը վտանգ է ներկայացնում ներկա և գալիք սերունդների առողջության համար և սպառնում են, որ հասարակական կարծիքի անտեսման դեպքում կմոբիլիզացնեն Երևանի բնակիչներին և կօգտագործեն հասարակական բողոքի բոլոր ձևերը` հանրային զբոսայգու անձեռնմխելիությունն ապահովելու համար:
Ճիշտ է, հայտարարության մեջ նշված է Կարեն Կարապետյանի եղբոր`Սամվել Կարապետյանի անունը, սակայն բոլորի համար հասկանալի է, որ հասարակական բողոքի դրսևորումներն ուղղված են լինելու հենց Կարեն Կարապետյանի դեմ: Հայ հասարակությանը Սամվել Կարապետյանի անուն-ազգանունը քիչ բան է ասում, իսկ ահա Կարեն Կարապետյանին ճանաչում են բոլորը: Այսինքն՝ Հայաստանում Սամվել Կարապետյան ասելով անմիջապես Կարեն Կարապետյան են հասկանում:
Կարեն Կարապետյանը Հայաստանի այն եզակի բարձրաստիճան պաշտոնյաներից է, որը, երկար տարիներ լինելով իշխանական համակարգում, այդ իշխանությունը չի ծառայեցրել իր բիզնես շահերին: Ընդհակառակը, մշտապես ցույց է տվել, որ պատրաստ է անձնական միջոցները ծառայեցնել հասարակական շահերին՝ ֆինանսավորելով բազմաթիվ բարեգործական միջոցառումներ: Չնայած ՀՀԿ-ում մեծահարուստները շատ են, սակայն Կ.Կարապետյանը եզակիներից է այս կուսակցությունում, որն իր անձնական միջոցներն է ներդնում կուսակցական ծրագրերի իրականացման մեջ:
Խոսքն այն մասին չէ, որ Կարապետյանը չքավոր է կամ սեփականություն ու բիզնես չունի: Նա բավական ընդարձակ բիզնես ունի, ուղղակի բոլորի համար էլ պարզ է, որ այդ բիզնեսները ոչ մոնոպոլիաներ են, ոչ էլ ձեռք են բերվել իշխանական լծակների գործադրման միջոցով:
Հայտարարության հեղինակները փորձում են Կարեն Կարապետյանի համար ստեղծել մեկ այլ իմիջ` մարդ, որն իր իշխանությունն ու դիրքն օգտագործում է ի վնաս հասարակական շահերի: Կարապետյանը մեկն է, ով պատրաստ է անխնա կտրել Երևանի կենտրոնում մնացած մի քանի ծառը հանուն իր սեփականության ընդլայնման:
Եթե Երևանի կենտրոնում ծառ է հատվում, դա, անշուշտ, դատապարտելի է, և պետք է պայքարել, որ դրանք չհատվեն, իսկ տարածքը չօգտագործվի ինչ-որ մարդկանց տնտեսական շահերի ընդլայնման նպատակով: Բայց պակաս դատապարտելի չէ, երբ էկոլոգիական խնդիրների շահարկումը ծառայեցվում է ոչ թե էկոլոգիական խնդիրների լուծմանը, այլ քաղաքական շահերի սպասարկմանը:
Գնահատում
